НТЦК спецыялізуецца ў распрацоўках складаных навукаёмістых вырабаў для сельскай гаспадаркі, аховы здароўя, іншых галін, аказвае інжынірынгавыя паслугі. Гэта найбуйнейшы навукова-тэхнічны цэнтр у Еўропе гэтага кштаўту. Калектыў - больш за 550 супрацоўнікаў. Праектная арганізацыя з магутнай інтэлектуальнай і матэрыяльна-тэхнічнай базай абсталяваная сучаснымі сродкамі кампутэрнага праектавання, высокадакладным вымяральным абсталяваннем, уласным эксперыментальным цэхам. Зараз яшчэ на этапе распрацоўкі ствараная канструкцыя праходзіць віртуальныя выпрабаванні. Падчас іх сучасныя праграмныя комплексы мадэлююць умовы і рэжымы працы канструкцыі — так забяспечваюцца ўмовы для далейшай бесперабойнай і надзейнай працы тэхнікі.
Падчас урачыстых мерапрыемстваў, прымеркаваных да юбілею НТЦК, генеральны дырэктар «Гомсельмаша» Аляксандр Новікаў адзначыў: «У 1947 годзе ў складзе новага падраздзялення працавалі ўсяго 15 чалавек. За 75 гадоў была створана досыць сур’ёзная лінейка тэхнікі, хоць пачыналі з найпростых машын і агрэгатаў для сельскай гаспадаркі. Сёння нам ёсць чым ганарыцца. Узяць хоць бы лінейку збожжаўборачных машын, якія сваёй прадукцыйнасцю здольныя задаволіць патрэбнасць усякага кліента. Гэта машыны прадукцыйнасцю ад 5 да 16 кг у секунду. Далей была сур’ёзная распрацоўка лінейкі кормаўборачнай тэматыкі. Выраблены шлейф машын магутнасцю рухавіка ад 200 да 600 конскіх сіл, вялікая колькасць навясных і прычапных адаптараў. Мы не стаім на месцы. У перспектыве – удасканаленне лінеек тэхнікі, распрацоўка найноўшых узораў. За апошнія тры гады зрабілі сур’ёзнае абнаўленне НТЦК. Кампутэрызаваны ўвесь працэс. Найноўшыя праграмы дазваляюць не проста кампанаваць машыну, а ў віртуальным рэжыме фактычна правесці яе выпрабаванне».
Распрацоўкі НТЦК ААТ «Гомсельмаш» асвоены не толькі ў беларускіх арганізацыях, але і ў замежных. Галоўны канструктар па маласерыйнай тэхніцы Аляксандр Чарнашэй з гонарам распавядае пра камандную працу калектыву НТЦК: «Калектыў вельмі згуртаваны, вырашае найважнейшыя задачы у распрацоўцы новай тэхнікі, мадэрнізацыі серыйнай. Мы ажыццяўляем навукова-даследчую працу, выпрабаванні. Сапраўдная каманда, здольная вырашаць задачы ўсякага ўзроўню. Працуем над новымі мадэлямі. Гэта тая тэхніка, якая будзе выпушчаная ў палі на працягу 3-5 гадоў. Усякая канструктарская распрацоўка мае перспектыву найбліжэйшай будучыні, потым выраб вопытных узораў, правядзенне выпрабаванняў».
